66A.

ബിരണ്‍ജിത്ത് February 4, 2013

Image Credit: Ahdieh Ashrafi @ Flickr


Freedom of Speech ചിത്രം: Ahdieh Ashrafi @ Flickr 66A.

ഇവിടെ ഞാന്‍ ഒരു കവിത കുറിച്ച്
മായ്ച് കളഞ്ഞിരിക്കുന്നു
ആഴ്ചപ്പതിപ്പുകള്‍ മടക്കി അയച്ച കവിത

കടം കൊണ്ട വാക്കുകള്‍ പകര്‍ത്തിയെഴുതിയ കവിത
റേഷന്‍ കടയില്‍ മണ്ണെണ്ണ വാങ്ങാന്‍ വന്ന കിളവി
എനിക്കൊരു നെടുവീര്‍പ്പ് തന്നു
ചുവപ്പു ബസ്സിന് കാത്തുനിന്നുമടുത്തൊരു അമ്മയും കുഞ്ഞും
എനിക്കൊരു ഗദ്ഗദം തന്നു
കുളിമുറിയിലെ വെള്ളം നക്കിക്കുടിച്ച് മരിക്കവെ
സത്‌നാം സിങ്ങില്‍ നിന്നൊരു പിടച്ചില്‍
"അമൃതദണ്ഡി"നാല്‍ ചിരട്ട ഉടഞ്ഞപ്പോള്‍
ബിബുവില്‍ നിന്നൊരു മുരള്‍ച്ച
കൂലി ചോദിച്ചതിനു സ്ഥലം മാറ്റപ്പെട്ട ജേര്‍ണലിസ്റ്റുകള്‍
എനിക്കൊരു മുദ്രാവാക്യം അയച്ചു തന്നു
ഭൂസമരപ്പന്തലില്‍ നിന്നൊരു കൊടിയടയാളവും കിട്ടി

എല്‍. പി. സ്കൂളുകളിലെ ബ്ലാക്ക്ബോര്‍ഡുകളില്‍
മുറിച്ചോക്കു കൊണ്ട് ഞാന്‍ വരികള്‍ കുറിച്ചിട്ടു
അവര്‍ സ്കൂളുകള്‍ ഒന്നൊന്നായി പൂട്ടി

ബസ്സിലെ സീറ്റുകളുടെ പുറകില്‍
ആദ്യവരി മാത്രം എഴുതിയിട്ടു
അവര്‍ ബസ്സുകള്‍ ഗ്യാരേജുകളില്‍ നിര്‍ത്തിയിട്ടു

സമരനോട്ടീസിലെ വരികള്‍ക്കിടയില്‍
ഞാനാ കവിത തിരുകിക്കയറ്റി
സമരസഖാക്കളെയെല്ലാം അവര്‍ നാടുകടത്തി

തെരുവില്‍ നിന്നു ഞാന്‍
കവിത വിളിച്ചു കൂവി
തെരുവുകളില്‍ അവര്‍ ശബ്ദം നിരോധിച്ചു

സൈബര്‍ ജനലുകള്‍ തുറന്നു
ഞാന്‍ കടലാസുതുണ്ടുകള്‍
കാറ്റിനോടൊപ്പം ചേര്‍ത്തു കെട്ടി
സ്കൂൾകൂട്ടികളാണ് ആദ്യം വായിച്ചത്
നിരത്തിലെ ജനവും
ട്രാഫിക് പോലീസുകാരനും വായിച്ചു
ചായക്കടയില്‍ സിഗരറ്റ് വലിക്കുന്ന
ചെറുപ്പക്കാരും, മെഴുകുതിരിപ്രകടനത്തിനു
പായുന്ന പെണ്‍കുട്ടിയും വായിച്ചു
പത്രമുടമയുടെ
കൂലിപ്പട്ടാളവും വായിച്ചു
അവരെന്റെ കടലാസുതുണ്ടുകള്‍
പിടിച്ചെടുത്തു
ഓരോ വാക്കും കീറിമുറിച്ചു
രക്തം വാര്‍ന്നു
എന്നെ വിലങ്ങു വെക്കാനുള്ള
ഉത്തരവിനൊപ്പം കവിതയുടെ
തിരുത്തിയ ശീര്‍ഷകവും ഞാന്‍ കണ്ടു - 66A.


66A, IT Act, Politics, India, Kerala, Labour, Poem, Commons, Struggles, Arts & Literature Share this Creative Commons Attribution-ShareAlike 4.0 International

Reactions

Add comment

Login to post comments